1° POESIA A TEMA "LA LUNA" di Salvatore Pasquale

03.06.2014 01:23

‘A Luna

Si ‘a Luna se sfasteriasse e fa ‘e nuttate
fosse assaje strano a guardà stu cielo.
E’ tanta l’abbitudine a la sapè llà ncoppo
ca nun penzammo cumme fosse ‘o cielo
se scumparesse stà cumpagna nosta.

E sì, pecchè pe mmè è cumpagna fedele,
ascolta e legge dint’’e penziere nuoste
e quanta storie ha viste’ ‘e nascere e fernì.
Osserva ‘o munno, ‘a quanno’ è nato
e nun ce stà n’archivio ca te po’ raccuntà
chelle ca sape.

Penzo ca fosse ‘a morte ‘da poesia
e ca la notte nera cchiù ‘e l’inchiostro
fosse l’inizio de ‘na pucundrìa.
Senza ‘o riflesse’ a mmare,
nun fosse bello a te vasà l’ammore
e se perdesse pure l’atmosfera.

Sarria senz’altro nu dramma senza fine,
cumme nu vico scuro e senza luce
cumme na vita senza ‘na speranza:
li nnotte facessero paura.

Invece me giro e ‘a veco llà
splendente, illuminata ‘e luce, 
riflessa sì ‘do Sole, ma bella cumme 
‘na rìggina ncoppo ‘o trono

essa nun c’abbandona 
e lascia ca ‘o penziero’
seguenne la sua luce…

saglie cielo.